施匡翹趁聖誕開騷

施匡翹(Zaina)昨日宣佈於本月二十日在九展開日夜兩場音樂會。她形容首次開騷好突然：“一個半月前經理人Apple姐對我講，年尾搞個演唱會好唔好？一星期後就話行動喇。其實出道時間尚短，雖然好似早咗啲開騷，但開完個唱後能增加經驗係好事，有得做就gogogo盡力而為啦！依家算幾好，除咗唱歌以外也會拍劇集，仲會學車及排舞，生活過得好充實。”

出道兩年多的Zaina、僅推出五首單曲及兩首合唱歌就膽粗粗挑戰個唱，被問能否撐到成個騷？她就表示唔擔心：“歌迷都好開通，好鍾意聽我翻唱啲舊歌。而且導演將五首單曲分成幾個主題，如《康復期》會比較傷感；《stay》係跳唱部分，到時會有跳舞環節。”

Zaina日前在社交網上載一輯性感靚相，身穿低胸裙展露“事業線”。對於大家對她“有期望”，她承諾演唱會時一定會有嘢睇：“至少都會騷吓四十六吋長腿。”會否換上性感戰衣配合？Zaina笑住爆少少：“唔係性感，服裝設計係比較誇張，好似模特兒上身咁。平時唔會見到我有呢身打扮，但我鍾意畀人設計形象試多啲新嘢。上次火辣紅裙係極限，大膽程度唔會超越呢個界線，相信最多露腿。上次係尊重新城頒獎禮場合，在朋友鼓勵下，諗咗好耐才敢放上社交平台。”