嘆新人輩出競爭激烈

鄭秀文：若遲出世冇運行

鄭秀文 (Sammi) 前晚出席《女人的故事》短片電影放映會，同場出席的還有導演許鞍華、王丹妮、蔡穎恩、陳漢娜、李靜儀、魏浚笙及許恩怡等。近年樂壇新人輩出，不少更唱得又跳得，即將舉行的樂壇頒獎禮有多首新人歌曲入圍，被指圍攻前輩。Sammi說：“又唔可以用圍攻呢個字眼，都係由歌迷去投票，自己幾十年來都玩呢個遊戲，明白遊戲規則，唔好覺得係激鬥，當係一齊進步。”

Sammi睇好哪一位新人？她沒有透露任何名字，只說：“而家太多新人，有一定競爭性，其實頒獎禮都係一個過程，攞唔到獎又唔需要喪志，有好作品隨時都會彈出。我覺得落到場都好難輕鬆，自己都參與過咁多年，又好難當落遊樂場，但亦唔需要睇得太重。”

Sammi大讚時下新人唱得又跳得，觀眾緣好。問她覺得哪個最有觀眾緣，她只說男、女都有，始終未有講出名字。可會特別留意跳唱新人？她說：“各有各好，跳唱在演唱會上好易帶出氣氛，慢歌入到觀眾個心有感染力，當然最着數又可以快又可以慢，外形又好，講嘢好得體，而家的新人水準真係好高，競爭好劇烈，如果我二十歲嘅時候參加女團，應該都危危乎，學舞又慢過人，肯定一早畀人踢出局，好彩我生於早段時期，如果唔係都唔知點算。”

聖誕將至，Sammi會跟家人同老公許志安一齊度佳節，但仍未買禮物，她說：“本身物質已經好豐富，我反而鍾意收到食物，我咁為食，例如牛扒、零食、黑松露薯片等，聖誕可以大吃大喝。”會否下廚煮聖誕大餐？她說：“唔會啦，我好懶，加上最近都冇乜入廚，（放棄下廚？）唔係放棄，係暫停，因為我食得好清淡，其實我都想去進修一下廚藝，想學煮中餐，之前曾經煮過東坡肉，但本身喜歡食得清淡。”