西門吹雪 坐位望贏

前領騎師高君濤頻添進帳，現以二十五W甩開對手，睇環境今屆冠軍又會落在其手。此子刻下氣勢盛，今晚五駒出戰可留意。另一當旺騎師劉永康亦精品在手，不妨重視。

劉永康上仗憑“浩勝駿爵”及“勇強追風”起個冷孖，捧其場者收到笑。此位本地大師傅連場撼低高君濤，表現悅目，反映寶刀未老。劉永康今挾起孖氣勢再臨，獲練者馮耀正及謝偉豪供馬搏殺，料必把握機會爭功，其座騎可看重。

第一場：四五班一五一○米。“實業家”在澳服役從未贏過，最叻跑二三名，但評分已有利，現居班次隨時可勝。此駒上仗千五米無功而回，拼後小休重來，今於四五班混戰，計馬足夠實力周旋。此均速馬直路竄勁強，今仗改配劉永康操刀，騎者手風正順，拼盡可替馬匹爭出頭。

第二場：三四班一○五○米。“滿貫藍寶”沙地出色，上仗同程負重磅贏來悅目。拼後重新打磨，論馬狀態保持得好。此番改由劉永康掛帥配搭亦強。騎者刻下手風正順，憑人強馬壯，可勝此陣。

第三場：一二班一三五○米。“西門吹雪”上仗草地敗後小休再來，今跑沙地又不同估計。此駒質高早熟，實力還未用盡，跑沙地更煞食。場上跟得鬥得，且前後兼具，同劉永康亦最佳拍檔。今番跑沙地憑騎者駕輕就熟，坐位望贏無“甩拖”。