連日多場活動捱唔住

炎明熹腳仔軟跌倒

炎明熹昨日出席宣傳活動時，先是遲到半小時才現身，之後再不慎叉錯腳兼腳軟失重心，整個人跌坐地上，其後返回後台小休時再次腳仔軟。她透露昨晚還要出席慰勞宴，會盡量現身。

炎明熹(Gigi)昨日出席宣傳活動，不過她到場時已遲了半小時，她透露因絞肚痛以致遲到。昨日只見Gigi雙眼通紅，未知是否唔夠瞓；當現場粉絲大叫其名字給予支持時，她已忍不住熱淚盈眶。隨後Gigi因不慎往後叉錯腳兼腳仔軟，整個人失重心跌坐地上，樣子非常無奈。同場的譚俊彥立即上前攙扶，並以身體遮擋以免她走光。Gigi企起身聽到現場粉絲大叫“加油”後，當場落淚。返回後台小休時，Gigi再次腳仔軟。

休息十分鐘後，Gigi脫去粉色外套再登場，與譚俊彥及鍾舒漫一起主持揭幕儀式。Gigi明顯情緒仍未平伏、眼紅紅，本來安排她在活動中獻唱，但最後仍以身體不適為由擱置演出。Gigi對現場粉絲說：“聖誕節快樂，保重身體，唔好好似我咁樣！”粉絲即以歡呼聲回報。

活動完畢後，Gigi表示因感冒未清而引致肚痛，之後即爆喊；待情緒平伏後，她表示前一兩晚瞓得唔好，並強顏笑說：“頭先跌倒真係好瘀！大家要保重身體。”她承認在台上是腳仔軟及不慎絆倒，但否認是沒有足夠時間休息：“只係自己休息得唔夠好，亦沒有刻意和公司請假，不想令人擔心，已經吃了腸胃藥治絞肚痛。”Gigi透露當晚還有慰勞宴要出席，表示不想失場：“會盡量現身，有時都要硬頸一下！”會否向公司請假休息？她表示要睇情況。

譚俊彥在Gigi跌倒後即時脫下外套給她遮掩下身，被激讚“風度暖男”，他指自己因為湊慣囡囡：“是爸爸的正常行為，當時亦擔心Gigi走光，所以立刻遮住扶起她。”他大讚Gigi夠淡定：“台慶夜見到佢上台唱歌好奇妙、好有壓台感！我囡囡都有睇佢，想了解佢多啲。本來今次想同佢傾多兩句，吸取吓教女的方向，點知未傾偈就嚇親我。”譚俊彥表示見到Gigi捱病都覺得心痛：“我有叫她要慢慢學識照顧自己，大家唔好畀壓力小朋友，希望日後可以和她合作拍劇，隨時願意幫忙。”

鍾舒漫表示好耐冇出席公開活動，感覺十分開心。她透露明年將會與跳舞老師及藝人合作舉行大型戶外騷，正在尋找可以容納幾千人的場地：“今次有份參與項目策劃，非常緊張，親自邀請了五位藝人參與。”

鍾舒漫與陳潔玲經營防疫用品生意，早前引發金錢糾紛，要打官司才能解決。舒漫表示未有因此對從商卻步：“人生要向前繼續學習，當自己上了一課，唔會因此驚咗再做生意，因為呢件事令我醒目咗好多。”