電視送飯靠魚骨

“無線”之名，港澳人似自降生人世就已被知曉，除非家中冇電視機。幾代人畀佢由細浸大，人生認知、甜酸苦樂，不少由此而來。唔少家庭清貧如許，然電視送飯，亦食大幾代人。

五十四年前今日，香港無線開播，轟動港澳，皆因收睇唔使錢。免費娛樂，大隻蛤乸隨街跳，人皆樂見之。一海之隔，澳門想亦雨露均沾，適時只有電台可聽，忽有另類娛樂，馬交仔興奮莫名。

當年傳出無線啟播，好事者執齊家生，因燈塔尚係禁區，唯到大炮台最高處，架起魚骨天線，祈撈吓電視汁。畫面於大霧雪花中，忽隱見無線台徽，成個彈起：“收到喇！”消息即時哄動全澳。

由是衍生一大行業：安裝天線。普天之下，家家戶戶有魚骨。偶遇強風，天線吹歪，電視機雪花兼大霧；電壓不足，畫面又變濶銀幕，仍無阻電視送飯情趣。於今數碼時代，回視之，猶似天方夜譚耳。

西門公子