吳若希寧要家庭棄工作

吳若希(Jinny)接受TVB娛樂新聞台節目專訪，談到事業與家庭要兩兼顧，她說：“錄歌、拍劇、宣傳、照顧家庭同時發生，真係覺得原來做一個雙職母親係好叻，好彩屋企都有很好的幫手。我都想投放多些時間畀屋企及小朋友，但負荷太重，我真係做唔到。所以要取捨，可能會犧牲自己的時間同工作，總之我希望可以令到另一半同小朋友開心啲。”

Jinny早前推出新歌《火和火柴》，她說：“今次參與度好高，由搵郭偉亮寫歌兼做監製，到諗歌曲概念同MV，我都放咗好多心機，由頭到尾都係自己心血，所以滿足感好大，好珍惜呢首歌！”

對於首次參與歌曲的和音部分，Jinny大感緊張：“我本身唔識唱和音，當時仲拍緊劇，完全冇時間練習。但郭偉亮叫我放心，佢話冇問題，一定錄到，仲話冇錄過一個人唔識唱和音。結果我真係錄到，好有成功感！佢真係好勁。”