自薦做打女被拒

陳明憙以音頻治癒歌迷

女歌手陳明憙早前成功考到音頻治療師資格，首隻將音頻治療加入流行曲元素的新歌更榮登電台流行榜冠軍，但她笑言最大夢想是打女夢，可惜被導演一口拒絕。

創作女歌手陳明憙(Jocelyn)新歌《聲之靜》登上電台流行榜冠軍，是首隻將音頻治療加入流行曲元素而且榮登榜首的歌曲。Jocelyn坦言非常興奮，預告EP將大玩音叉元素，以旋律治療歌迷。她介紹指：“其實呢首歌有安眠作用，可以令人放鬆心情，所以歌迷每日起身都會聽一次，令佢哋放鬆之餘，又可以幫我提高瀏覽量，咁就係雙贏局面。”

雖然新歌榮登電台流行榜冠軍，但Jocelyn笑言無暇放鬆，因為要為拍攝工作做準備：“我都想去慶祝啊，但係過兩日要參加拍攝Casting，呢一刻都係好緊張。還有個國際品牌邀請我拍廣告，完全唔敢放肆！唯有日日用音叉幫自己放鬆兼去水腫，經理人陪我做治療，佢都大讚有功效。”她透露明年就會推出唱片：“每首歌都會加入音頻治療的音叉，首首歌都有唔同的作用，照顧大家每日的情緒。”

成功考到音頻治療師資格，陳明憙笑言係搵“身邊的朋友”做白老鼠：“我試過搵狗仔去做治療，佢哋好乖咁坐定定聽我用音叉發聲；不過貓貓就駕馭唔到，佢以為我的音叉係玩具，走來咬個音叉，真係冇晒辦法。反而有啲朋友用我呢首歌去玩瑜伽舞，不過我自問就冇天份，唔敢出來跳畀大家睇。”

忙於音樂宣傳的陳明憙，早前投身劇組拍攝工作，她笑指曾自薦做打女，但被導演一口拒絕：“其實我好想做打女，練泰拳已有幾年時間，加上呢排有學詠春，諗住都係時候出手喇，點知導演話我的角色完全唔使郁手，撲熄咗我的打女夢！我對經理人講，幫手介紹吓我打女的一面，唔怕打傷、唔會錫身，可能就會發掘到我原來係一個被音樂耽誤的動作演員呢！”