葉晴晴難專心兼顧創作

創作歌手葉晴晴(Robynn)接受TVB娛樂新聞台專訪，大談產後推出新歌的感受。Robynn說：“我錄呢首歌的時候差唔多要生仔，原來大肚婆好容易會熱，體溫與平時唔同。我全程坐着錄，叫監製蘇道哲唔好望我，因為我要周圍抹汗。唔知係咪荷爾蒙影響，我覺得情感豐富咗，錄音時候好似唱緊故事。”

Robynn為新歌MV執導及剪片，她說：“拍MV係辛苦，不過最大挑戰係成日冇見過個女，中間拍拍吓都好掛住佢，要望住個電話，睇吓佢做緊乜。最唔捨得係佢望住我離開門口的眼神，好唔捨得！不過依家好咗好多，投入工作就冇嘢。”

被問同時兼顧做媽媽是否有困難？Robynn直言曾有不安：“依家要慢慢學習做母親的同時亦係一個歌手，我唔可以留在屋企寫歌，好難專心！平時我要用六、七個鐘頭進入創作情緒，才可以寫到歌。如果只得一兩個鐘頭，對我來講係好困難。所以有時我會搵有工作室的朋友，問佢可唔可以借地方畀我？又叫佢唔使理我，我匿埋一邊寫歌就得。”