周國賢唔強求紅館開騷

周國賢日前接受TVB娛樂新聞台節目專訪，談及他最近與不同單位如Zpecial、Regen、JW王灝兒、ToNick、AGA、Serrini、per se等合作，他說：“如果用畫畫嚟形容，佢哋畀到我好大鮮艷度，打開我以前在日本讀書時聽歌的視野！”

談及相隔近三年再推出的新歌《塵世美》，周國賢說：“去年停工係因為之前做咗好多嘢，包括出碟、做騷及拍戲，一路都冇休息。當時心想不如去一趟靈修之旅，諗住去京都同清邁，點知到泰國後遇上疫症最嚴重時期，頭一兩個月一直爭取搵機票返香港，但真係完全冇機位。心想既然天要我留下，咁就不如好好學習同自己獨處。《塵世美》呢首歌，就係在泰國酒店的床上度出來的。填詞人小克一個徵求旋律的Post，咁就搞掂！當時我好得閒，大概一個禮拜就完成這首歌。”

周國賢於上年休息期間，本應有機會首次在紅館開演唱會，但他說：“紅館係一個好神奇的地方，唔同歌手同佢邂逅的時機都好唔同。我以為自己已準備好，但當上年四月有期畀我，我又傷咗腳；再加上疫情嚴重，真係唔敢博，唯有取消。好似個天要話畀我知，不如你再修練吓！可能我真係未準備好，依家我睇通咗好多。”