與同門拍靚相賀中秋

熊黛林過節慶幸放假

熊黛林日前與同門師弟妹拍攝了一輯靚相，又一起製作中秋燈飾，齊齊送上節日祝福，祝願大家平安團圓，中秋佳節愉快。

一年一度的中秋節馬上就到了！同門藝人包括熊黛林(Lynn)、陳嘉寶、陳毅燊（Ansonbean）與劉沛蘅(Hillary)日前相聚一起提早賀中秋，並拍攝了一輯靚相，為大家送上節日祝福。

中秋節是中國傳統節日之一，Lynn非常重視，今年她與兩個寶貝女Kaylor與Lyvia花了不少心思在家中佈置，製作小燈籠、貼貼紙，共度親子時光。Lynn說：“今年中秋節真係好難忘，因為BB之前仲細，未明白中秋節意思。依家已經開始慢慢長大，今年已經明白甚麼是中秋節，今年仲可以一齊佈置屋企。開心之餘又可以當一個親子活動，同時會教佢哋一些中秋節的傳統習俗，過一個開開心心的中秋節。”

已為人妻，又要照顧兩個寶貝女，同時亦保持適量的工作，Lynn透露本來中秋節要到內地工作，幸好工作檔期有所延遲，令她可以與家人在家共度佳節、團團圓圓。她說：“今年好好彩可以留在香港過中秋節，我哋係比較傳統的家庭，所以每逢過節都會一家人齊齊整整咁食一餐飯，今年更加唔會例外，會同爸爸媽媽及姑媽等一齊大家庭過節。”

將於年底生第三胎的陳嘉寶，今年中秋節一如既往與家人熱鬧共度，她更專誠走訪老式燈籠店尋找兒時回憶。嘉寶說：“我最難忘係細個時候有一個用玻璃紙做的宮廷款式燈籠，大個咗想搵返呢款燈籠，但已經搵唔返。因為囡囡已經識得玩燈籠，所以今年我特登去傳統的舖頭問有冇呢款宮燈？可惜師傅話冇做啦，最後揀咗小金魚燈籠畀囡囡。”她笑言都有跟兩個女一同DIY製作燈籠，可惜未到中秋節，燈籠已被“解體”，十分搞笑。

今年剛出道的Ansonbean表示今年中秋幾難忘：“因為之後有工作需要，要好好喼弗，所以乜都唔食得。其實以前婆婆會將食剩的月餅畀我當早餐，所以中秋後一段時間都會繼續有月餅食，真係好難忘。”

Ansonbean感恩出道以來一直獲得大家的愛戴，所以他亦趁中秋佳節，精心準備了一些心意禮物答謝幫助過他的人。他說：“因為今年第一年出道，都好想多謝一些幫助過我的朋友，所以就準備咗一啲小禮物，希望大家中秋節快樂！”

Hillary表示每年中秋節，家人好重視相聚的時間，而且必定會食月餅與芋仔應節。不過，正在減肥的Hillary預告必定要破戒，她笑說：“我每年都一定會同屋企人食飯，就算有工作都希望盡量遷就。依家雖然要減肥，但係我都要食月餅同芋仔，因為呢個係習俗，最多我之後幾日唔食嘢啦。”