獲家人準備香檳美食慶祝

宋宛穎淡定攞冠軍

香港小姐選舉前晚圓滿結束，宋宛穎贏出冠軍、亞軍梁凱晴、邵初膺雙料季軍、楊培琳獲最上鏡小姐奬。TVB主席許濤昨日頒獎予四位出爐港姐，在曾志偉帶領下，出爐港姐首度會見傳媒。

無線副總經理曾志偉昨日出席應屆港姐會晤傳媒活動，志偉表示港姐決賽平均收視有廿六點一、最高收視點為廿七點四，該時段正值“歌神”張學友表演。志偉說：“難得有呢個收視，台前幕後都好開心，冇白費辛苦。”談到頒發最上鏡小姐時發生小插曲，志偉被發現黑面兼發火鬧工作人員，昨日他開玩笑表示：“係咪現場打燈打得唔夠光，所以黑咗少少咋？我唔係黑面，係緊張！因為見到工作人員不斷打手勢拉長（時間），所以撲落去睇，原來宣佈最上鏡小姐環節時，台上有八位佳麗，仲有四位落選未上台，原來佢哋換錯衫，趕唔切出場。”志偉又表示完騷後有跟司儀和幕後工作人員檢討流程。

港姐決賽前晚結束後，宋宛穎接受完傳媒訪問後便回家跟家人慶祝，無線娛樂新聞台亦直播她返家慶祝情況。宋宛穎的家人包括婆婆早已準備了香檳和美食慶祝，主持王鎮泉跟宋宛穎家人傾偈，婆婆說：“好感動，眼濕濕，佢媽咪就緊張，澳門有四十幾人一齊慶祝，個個嗌到不得了。（覺得孫女表現如何？）都OK，今日叫過骨。”問及宋宛穎是否來自選美世家？婆婆說：“可以咁講，佢媽咪、堂家姐、堂妹都係；本身我的堂家姐在幾十年前，都係加拿大小姐及三藩市小姐。”不少網民留言讚宋宛穎婆婆端莊嫻淑。

宋宛穎品嘗了婆婆炮製的炒飯及杏仁蛋糕，她說：“好多個月冇食炒飯，唔敢食太多，先試一羹。（比賽前有冇食過嘢？）出騷前冇食，冇時間。”外婆則表示宋宛穎由細到大都喜歡吃炒飯。宋宛穎表示：“我覺得準決賽做得好啲，今（昨）晚未係最滿意，如果要畀分就畀九十分。”問到宋媽媽是否今次幕後軍師？宋宛穎說：“每一餐都向佢匯報，比如我好想食一樣嘢，先問佢食唔食得，仲會影埋相。（要佢通過？）係呀，佢話得我就食。（圓夢？）係呀，媽咪都讚我好好，佢好為我高興同驕傲。（媽媽平時點讚你？）佢比較中肯，如果真係好，佢會讚，如果唔好都會指出我的缺點。”