麥美恩喜劇天份未盡露

劇情明明講吻到躺地、兩嘴緊貼一分鐘——在《智能愛人》中演古家儀的麥美恩，鄭重澄清：此非熒幕初吻！鬼妹的標準解釋係“要雙方Kiss”：“劇情係我單方面被Rocky Kiss，此刻係冇過電感覺，佢純粹用人工呼吸救我。”那麼，熒幕初吻想獻給誰？“搵個靚仔啲嘅，”以為時髦港女一定揀個白白滑滑、體態柔美的“小鮮肉”，不料麥美恩哈哈大笑：“我好鍾意古天樂，佢好靚仔。”碰上娛聞不解難題了！古天樂出名“緋聞絶緣體”，平時不談女色，拍劇不親女人，秘聞就是由細到現在都與父母同住，方便照顧；好多女星表示想埋身，都了無下文。

三十幾歲女仔、混迹娛圈、一事無成，戲中“家儀”的際遇，麥美恩演來入戲：“我又唔係阿佘，” 家儀在天台自怨自艾，其實反映好多藝人的心聲。麥美恩坦言：“我都三十幾歲，一定會同人比較，表演嘅嘢講天資，不是勤力就得。雖然我都係選美出身，但我唔算特別靚、唔算身材特別好，也不是一出道已成為力捧對象。自己係好好彩嗰個，耐心用時間去證明好多嘢，慢慢有工作機會，檢討自己演出，覺得心路歷程好眞實。”麥美恩咬緊牙關苦幹，已得到重用，近年在大騷中已與各大金牌司儀並肩，站在嘟姐身邊毫不遜色。

檢驗藝員實力，除電視台力捧外，更重要看廣告客戶，無論本地品牌、國際品牌，代言的藝人講級數的，演戲能演出商業價值，便是電視台的金童玉女了。

溫哥華土生土長的美恩笑說：“我係鬼妹，但我講英文唔可以字正腔圓，平時好留意身邊人點講嘢，聽完自己講都覺得好難聽。”麥美恩說出個重點來，劇中激動講對白時，嘴形有點誇張，因刻意運腔發音之故。霎時神馳物外，麥美恩這甜甜臉孔，若表情“收火”一些，好似莎莉麥蓮了。

兒時在澳門平安戲院看西片《花街神女》，巴黎菜市場晨光熹微之際，有人拖着疲憊身軀回家、有人沒有家。“神女”莎莉麥蓮遇上豬肉佬積林蒙，男女主角都是喜劇巨星，悲劇喜做，“賣肉女”與賣肉佬交纏……幾十年彈指間，看到麥美恩苦情喜做，竟然令人想起“儍大姐”莎莉麥蓮！

高梁