《出租女友》延期上映

鄧月平扮黑寡婦效果佳

由鄧月平(Larine)、秦楚瀅（娜美）、程美段、張沛樂（沙律）、郭奕芯 (Ashina)、馬俊怡 (Rose Ma)、葉俙賢 (Amber)、素凱琳 (Erena)、曾嘉晴 (Angel)和陳莉寶演出，新導演鄭峰嵐編劇及執導的輕喜劇電影《#PTGF出租女友》，決定由原來本月九日上映延至廿二日上畫。日前釋出新片花，片中包括市民街訪對於“ PTGF ”有何睇法，同時介紹電影內的十位“兼職女友”。

宣傳片中，展示了十個女仔的角色各有不同性格。除了馬俊怡、郭奕芯和陳莉寶打扮性感外，飾演PTGF 好姊妹的Larine和娜美以學生Look上堂，被老師問“可唔可以介紹一下咩叫打飛機加八百？”一語篤爆兩人身份；另外她們又以Cosplay於黑夜現身街頭，Larine戴短髮、穿貼身黑衫，Cool到爆扮黑寡婦，她路經街頭時更偶遇男主角趙善恆；而娜美則扮小丑女，一頭白髮穿緊身衫，原來兩人係Cosplay做私影，供龍友拍照。

Larine戲中飾演“芷純”，她覺得黑寡婦這場戲很特別，因她一直想挑戰不同演出，當日拍Cosplay更包含打戲：“套戲服係度身訂造，要插電令到套衫着燈，服裝方面造型同個頭妝都好有心思，港產片見到黑寡婦，好佩服導演創意。”Larine指導演為了效果更好，不惜重拍，她也明白港片要拍多次成本很大，“效果出嚟係嘩然，我覺得黑寡婦直頭可以拍一部戲，拍得好好睇。”

娜美飾演芷純的好友，角色係MK妹，任性大花筒、但對朋友很有義氣，戲中娜美要講粗口，她笑言自己都要適應：“拍戲嗰段時間好投入角色中，有次我同屋企人食飯，同媽咪講咗句粗口，嚇親媽咪。”她指角色跟自己最相似的地方係錫朋友，很維護芷純。