黃翠如與監製搞笑拍宣傳片

黃翠如近日為無線劇集《七公主》拍最新宣傳片，更在片中質問監製陳維冠(Joe)係咪玩嘢？但當聽到Joe透露仍在改動結局時，即時嚇到走人，場面搞笑。

黃翠如在劇集《七公主》中飾演“大家姐”顧靈珊，由於角色冷酷又強硬，人物性格不甚討好，雖然有網民認為她演技有進步，但仍招惹負評。翠如於是聯手該劇監製Joe拍攝了一條最新宣傳片，玩轉靈珊角色性格缺點。原本係威係勢、執住水槍對準監製質問的翠如，遭Joe拋窒一句後，秒速變回乖巧兼道歉走人，兩人舉動充滿趣味性，合作不愉快傳聞不攻自破。

宣傳片開頭，翠如型格十足地步向Joe，並狠狠地說：“Joe！我要同你算帳！搵我做個咁嘅角色？又Cool、又Mean、又要我減十幾磅，咁破格，係咪玩嘢呀？監製！”見慣大場面的Joe相當淡定，徐徐解釋：“角色同性格反差大至過癮嘛！結局我仲執緊，畀啲嘢你再啃好冇？”原本一臉嬲爆的翠如聞言，忍唔住一臉八卦咁問：“點啃法？我唔係丹爺個女？”正當以為Joe爆料之際，他卻冷不防謂：“講畀你聽就唔好玩啦！”於是翠如想再射水槍逼供，豈料卻遭Joe靈活反擊，快速搶走水槍射返翠如轉頭，並甚有威嚴地拋出一個字：“走！”嚇得看似佔盡上風的翠如瞬間變得乖巧，連聲道歉並急急腳走人，兩人整體表現均甚有喜感。

Joe隨即大讚翠如好貼心：“佢近排真係好忙，所以兩次都夾唔到我哋宣傳期，佢都好唔好意思。今次知道要拍宣傳片，佢好緊張咁度期，希望盡量配合，真係好多謝佢。”