江海迦期待再續前緣

Dear Jane下月進軍紅館

樂隊Dear Jane與AGA聯手，前晚於會展中心舉行一場演唱會。 Dear Jane在完騷後宣佈喜訊，指下月尾在紅館舉行的三場演唱會加開廿五號一場，並邀請AGA做表演嘉賓，又指前晚可算是一次預演。

香港男子樂隊Dear Jane前晚與AGA（江海迦）再度聯手，於香港會展中心舉行演唱會，為KK Live舉辦的演唱會系列揭開序幕。當晚除了楊洛婷到場撐老公Tim（黃天翱）外，有陳凱詠、Kerryta和組合石山街等也現身支持。當Dear Jane在台上演出時，楊洛婷和囡囡Tanya在台下高舉燈牌打氣，Tanya不停紮紮跳、表現興奮，當聽到自己的名字更走到台前，但即使老竇Tim在台邊蹲下身，Tanya仍唔夠高掂到老竇，楊洛婷見狀即上前抱起Tanya來個父女握手，場面溫馨。

演唱會由Dear Jane率先登場，結他手Howie現身一刻即大叫：“全部企起身好唔好呀！”樂隊率先以大熱作品《銀河修理員》揭開序幕，觀眾紛紛站起來一起大合唱。及後AGA登場，隨即與Dear Jane合唱《Mad》，瞬間令全場氣氛升溫。Dear Jane稍作休息，在AGA唱過《孤雛》後，他們再度合唱《無可避免》。

眾人在演出結束後接受訪問時直言未夠喉， 主音Tim解釋：“太耐冇玩現場騷、太耐冇一個咁大的舞台、太耐冇現場見到咁多觀眾，呢幾樣再加埋現場氣氛，大家都有啲掛念。”AGA補充道：“呢種場地和規模的演唱會，我依家會非常珍惜。以前可能係一年做好多個騷，令到今次感覺好唔同，大家在台上都有啲沉澱、有啲改變。更加有意義的是自己做音樂，可以同大家分享音樂，度過好開心一晚，我覺得呢三年好多人都好需要呢樣嘢。”

談到Dear Jane和AGA最後一刻決定加碼獻唱《哪裡只得我共你》報答歌迷，Tim直言事前從來沒有這個安排，“大家都要臨時在台上商量”。不過他們傾向唱一些當晚未唱過的曲目，亦與整個演唱會的構思有關：“其實呢首歌本身都在歌單中，改過幾次之後就決定剔除。但係呢首歌都好襯今晚主題，大家隔離在一個好遠的地方，呢首歌都可以話係用來聯繫返大家，令呢首歌變得更加有意思。”AGA也直言當時一下反應不及：“有種要重新適應觀眾熱情的感覺。”

談及下個月Dear Jane將進軍紅館舉行演唱會，四子認為今次正好讓他們熱身，Tim說：“去到紅館，當然係要唱多兩三倍的歌，但係排練呢個騷的同時，其實一路當係練紅館唱的歌去彩排。今晚演出終於完成，我哋其實過一日就要繼續練，因為仲有一個禮拜我哋就要入彩排室，所以唔好畀佢停！”被問到會否邀請AGA擔任嘉賓？AGA直言非常期待再續前緣，低音結他手Jackal（伍漢邦）也表示非常歡迎：“我哋頭先只係試吓邀請AGA來睇演出，但係佢提議不如一齊玩。其實我哋係超級願意，係好想！”