永和態起趁勢添食

騎師冠軍之爭形勢明朗，高君濤現頭馬拋開張志立十五場。本季尚餘六次賽事，對手要反先每次要贏三場，似有點奢望。高君濤已拎住半邊盃耳。

練者形勢未有定論，錢健明現有四場頭馬優勢，張兆煊近期愈追愈近，睇環境廄主亦具爭冠決心。計落條數仍有得追，且看賽至埋尾冠軍屬誰。兆廄今仗強駒出擊，擺明搏殺，此路人馬要吼緊。

第一場：四五班千二米。“江河精彩”上仗同程贏得輕鬆，表現進步不少。此駒質新體態強健，賽至季尾贏體力。拼後再磨論態更進一步，今次原配張志立再戰原程，此子騎過熟知馬性，料發揮會更佳。今遇對手不外爾爾，值得追多一次。

第二場：五六班一○五○米。“江河大利”上仗同程後上得第二，直路走勢強勁。此仗雖未竟全功，但表現可人。此質新馬潛力未用盡，拼後加強磨練，今仗原程續戰正合腳法。換上余健雄掛帥配搭不弱，出閘跟順且戰且走，坐位望贏可做到。

第五場：五六班千六米。“永和”季內屢拼不逞，賽至季尾狀態跑起，上仗贏來還有大把在手。拼後小休再來，今次增程續戰要趁勢添食。原配鮑羅素操刀人馬夾檔，遇上同組對手無多，有力再下一城。