創富傳承坐位望贏

澳馬跑埋今晚，本月只剩兩次賽事。踏入季尾，練者冠軍之爭形勢明朗。錢健明現領先張兆煊七W，計數仍佔一定優勢。但兆廄近期愈追愈近，賽至埋尾可否反先未知。今晚此廄屯重兵出擊，睇環境有馬贏。

張兆煊廄季尾攻勢不斷，月來頻添進帳，成績急彈，現時排名亞軍，有力與錢廄抗衡。練者為爭奪冠軍，戰駒逢出必拼，搏盡為止。今晚精品應戰，馬房擺出搏殺格，值得留神。

第一場：二三四歲一○五○米。“江河大利”上仗同程後上第二，走勢予人好感。此匹三歲馬季尾成熟漸足，可放可追，表現不斷進步。拼後再磨狀態更進一步，今番易配中野省吾操刀戰鬥力更強。此駒續跑同程正合胃口，憑路合磅輕，可竟全功。

第三場：二班一五一○米。“創富傳承”上仗初出即勝，贏來大把在手。馬匹能跟可鬥，跑沙地好腳法。拼後小休又來，續由余健雄掛帥人馬夾檔。今次升班遇同組對手多不穩分子，憑輕磅出擊，坐位望贏可做到。

第五場：六班一三五○米。“明軒一號”上季贏完再無頭馬見面。今季屢拼不逞，最多跑位置，季尾幕後極欲替牠贏馬。今次用高君濤操刀擺明車馬要搏殺。今仗復跑此途正合脾胃，遇上同組弱旅居多，憑騎者功架可勝此局。