商天娥自揭因馬明復出

商天娥日前接受香港電台《舊日的足跡》主持人車淑梅訪問，暢談復出拍劇的因由，以及與丈夫的甜蜜婚姻、對生兒育女的看法。

商天娥有份參演的電視劇《寶寶大過天》即將大結局，她在劇中演活烏龍嫲嫲一角，備受歡迎。她對劇集收視很有信心：“我六年冇拍劇，我係有信心的。因為朋友都話餓咗我的戲好耐。今次復出原因有二，一係戲癮；二係同馬國明有關。我識佢好多年，佢成日在化妝間主動同我傾偈，娥姐前娥姐後。日日都見佢爆騷爆到七彩，我就笑問係咪儲錢娶老婆？佢話希望買多間屋畀阿媽住，咁即係代表依家呢間留畀自己？哈哈，但我唔可以代佢講出來。”

商天娥入行三十八年，是當年電視台力捧的花旦，但她卻非常專注拍拖。娥姐於四十多歲時才與男友Patrick 結婚。有說男方之前暗戀她十多年，一直未婚、默默等待她，商天娥聽罷哈哈大笑：“呢樣嘢你要問佢，我唔方便問，我真係咁耐都冇問過佢。其實我唔介意，亦無所謂，大家都係四十幾歲成熟的人，問咁多做乜？我好記得，我哋第一次單獨約會時，佢話自己唔係好有錢，問我會唔會介意？我就話咁就好囉，我唔鍾意好有錢，夠就得啦！”

商天娥的心願是能夠生兩個女兒，可惜兩夫妻遲婚，未能如願，娥姐亦明白不可以強求：“我同老公曾經諗過領養，但真係要去領養的時候，老公係有潔癖的，佢擔心細路仔父母DNA有問題，萬一有惡習脾性等等點算。我就話算啦！我哋放棄呢個念頭，兩個人相親相愛就夠。”