昨晚賽事總投注近二百八十萬

中野省吾起孖最醒

昨晚沙地賽完結。是仗出馬疏落，戲碼平淡，總投注共二百七十九萬七千元。

頭場七駒角逐跑出冷頭熱腳。蔡義武騎鄒廄“高而靜”出閘快放，由頭直帶到尾爆十七倍冷W。此雙人馬上次爆完大冷再來，今次仍受人冷落。騎者照辦煮碗搶先帶頭，全程領放從容走返，人馬連捷，替馬房再建一功。蔡義武、鄒欽華攜手拔頭籌。“高而靜”近期愈戰愈勇，成馬房取分功臣。

第二場七駒出戰爆開又爆。浩廄“乾卦”由中野省吾掛帥，快放爆十二倍冷W。此駒跑淋地醒神，跑沙地從未贏過。今次遇上馬少場合，出閘快步跟前，沿途且戰且走，轉彎入直路發力掟甩對手，贏至離行離列，打破沙地未贏過宿命。浩廄目前成績包尾，今次憑“乾卦”爆冷喜添一W，騎、練合作愉快。

第三場安萬堯再贏譚廄“豐收寶”。此雙人馬上次同程爆大冷，贏完後小休再來，巧遇宿敵“勝利皇星”仍不示弱。出閘搶放，沿途鬥至難分難解，埋門脫穎而出，人馬打疊贏兩場，表現無懈可擊。譚廄增添頭馬，騎者居功不小。

第四場余健雄贏馬。此子騎兆廄“創富傳承”出閘快放，沿途同“創投精英”纏鬥，入直路發力衝刺，擺脫對手直奔終點。此駒在澳首度出戰，賽前有充分準備。今次起用余健雄操刀一出即勝，替馬匹打響頭炮。“創富傳承”質新勇進，開竅後料還有頭馬見面。

尾場中野省吾起孖食尾餬。此子騎豪廄“量子力學”以強橫後勁挫敵，爆十六倍冷W。此駒起步大漏閘，全程發力追趕，埋門如飛將軍從天而降，殺至同組對手一頸血。豪廄喜添一W，中野省吾獨中孖寶，成績最醒。