聲音百變諧劇王

“飛哥跌落坑渠，飛女睇見流淚……”叔父輩聽見此曲，當即後生幾十年，尚可返晒當年勇。昔時流行飛仔飛女，花衫窄褲飛機頭，印身印勢兼口花，乃神台貓屎，神憎鬼厭。跌落坑渠，實大快人心。

此曲一度流行經年，幾乎係人識唱。唱此曲者，乃“諧劇大王”鄧寄塵。今人未必熟悉此公，然昔日粵語長片，唔少都有佢。雖非主角，卻冇佢唔得，因佢口窒窒夠恢諧，誠最佳綠葉。

鄧公早歲入娛行，專事廣播，其人恢諧，聲音善變，一人竟可同演八聲。於聽聲年代，誠奇才也，故有“諧劇大王”美喻。於觀影年代，曾夥拍不少大牌，演盡滑稽，與西瓜刨係粵片一對活寶。

鄧公存世最多者，乃粵語流行曲。當年曲風用詞通俗，絕核抵死，一聽入腦，再聽會唱，故極流行。“詐肚痛，去屎坑排長龍……”是為經典。

今日鄧公駕鶴三十年矣。

西門公子