梁諾妍睇疫情定婚期

蔡思貝與梁諾妍昨日出席眼鏡品牌宣傳活動，蔡思貝早前在清談節目中自爆曾住二百呎屋、睡碌架床，昨日她說：“我現在都是住在這間屋、仍然瞓碌架床。我年多前係在將軍澳買樓，但因為係樓花，所以仍未能搬進去住。其實這些都不算是甚麼辛酸史，我有地方住已經比其他人幸福。只係當時有好姊妹在場才感觸到哭。至於在節目中提到收到二百萬的飯局價，這些留言間中都會收到，但再多錢都不為所動，我性格比較硬頸，做人要有骨氣。”

早前宣佈與洪永城結婚的梁諾妍，笑言已入紙註冊，婚期亦在這幾個月內，卻未肯透露確實日期：“等肯定晒才向大家講，因為疫情問題，之前話婚禮只可以有二十個人，後來又話可以有五十人，之後唔知會唔會再變，我哋係睇住個疫情去進行。”

問到婚禮籌備情況，她表示雖與男友在工作上各有各忙，但男友仍負責大部分籌備工作：“因為佢要求高啲！係麻煩少少，但冇麻煩到我，我就乜都冇所謂。以搞婚禮的狀態來講，佢似新娘多過我，例如婚禮主題、顏色同花，佢都好着緊，好似我係娶老婆咁。”她笑言若對方不介意，可以別開生面：“叫佢戴假髮，我就穿西裝，應該會幾好玩。”