幾路湛漸入佳境

澳馬跑埋今次賽事，本馬季只剩兩個月。踏入季尾，不少練者極欲為季內未贏之駒謀交代。上周五晚譚文就伺機“發圍”，一口氣直落贏三場，馬房中人大有斬獲。今仗譚廄會否再搏未知，睇出馬實力要中三元唔易，若贏到一場已足。

騎師睇好高君濤可起孖。此子周五晚多匹座騎熱門死火，但最終可起個孖，表現未算太差。現以五十七W甩開張志立十四W，今屆冠軍已揸住半邊盃耳。今仗高君濤承接周五晚起孖氣勢出擊，其座騎值得看重。

第一場：六班千二米。“江河飛騰”上仗田中正一跑同程闖入連贏，人馬演出不差。拼後加強備戰，馬匹狀態比上次更佳。今番易配高君濤操刀，幕後擺明意謀交代。此駒質新未盡，直路竄勁夠強，今仗人強馬壯，不妨睇高一線。

第二場：三四班千八米。“幾路湛”質新未見底，季尾走勢漸入佳境。此駒上仗千五米得第二仍未竟全功，今次原配高君濤跑千八米尤合發揮。“幾路湛”跑中長途氣力充沛。今遇同場對手多為喎妥之流，隨時可一網打盡。

第五場：四班千五米。“美麗人生”上仗千二米後追不及跑梗頸四，大熱門輸得人多。敗後重新打磨，今仗增程再戰復由高君濤主轡，幕後擺明要贏馬將功補過。騎者連仗摸過此駒，對馬性有更深了解。此駒跑均速，直路竄勁夠強，今番檔宜路合，可復前失。