獲頒授藝術與文學勳章

林嘉欣曾以為騙案

林嘉欣日前獲法國政府授勳，以表揚她多年來努力宣揚法國藝術。嘉欣在丈夫袁劍偉及兩個囡囡陪同下，到法國駐港領事官邸出席授勳儀式。

曾留學法國的林嘉欣，今年已是第八年擔任法國五月藝術節大使(Le French May)，每年亦會遠赴法國，與當地來自不同界別的藝術家進行文化交流。為表揚她多年來宣揚法國藝術的努力，法國政府最近向林嘉欣頒授“藝術與文學勳章”。

林嘉欣笑言去年四月收到授勳通知時，以為被整蠱︰“因為呢封信係由加拿大政府發出，話我獲法國政府授勳，我睇咗封信好多次，仲向先生了解係咪呃人？疫情下仲有呢啲騙案？後來才知道因為我在加拿大出世，法國要認證我的國籍，所以呢封信由加拿大寄出。”

當知道真的獲法國政府授勳，嘉欣坦言有一種超現實的感覺。授勳當日，嘉欣由丈夫袁劍偉、還有兩個囡囡陪同下，到法國駐港領事官邸接受勳章。兩個女兒獲安排協助法國領事舉行授勳儀式，嘉欣說：“兩個囡囡負責托住放有勳章的枕頭仔行出來，我同佢哋預先在屋企彩排過，仲帶佢哋買新裙仔。因為囡囡好似野人，成日通山跑，平日啲衫穿晒窿，一定要帶佢哋去買衫。”

授勳儀式完成後，嘉欣以法文及廣東話致辭。她說：“因為冇得飛，太耐冇去法國，冇機會講，法文大退步，所以我搵咗一個好好的法國朋友幫我翻譯致辭內容。我衷心多謝French May團隊，令我過去八年認識到好多世界頂尖藝術家；亦好多謝屋企人，包容我每年去法國交流。”嘉欣又表示：“今次能夠得有此榮耀，會如常學習、如常生活，亦都會教導囡囡，要努力尋找夢想，我一直身體力行做一個榜樣。”