昨晚賽事總投注三百四十二萬

譚文就直落贏三場

昨晚沙地賽事完結。是仗出馬有限，戲碼平淡，五場總投注額共三百四十二萬元。

頭場五班混戰，高君濤騎陳俊輝廄“洪進威”，大熱先拔頭籌。此駒上次一五一○米只跑第三，敗後縮程再戰。今次用到最強配搭高君濤掛帥，出閘守住第三，全程亦步亦趨，入直路發力一攻而破，頂頭大熱門贏來兵不血刃。“洪進威”沙地最佳出路，季内走势漸熟，下次再戰同程宜重視。高君濤、陳俊輝攜手添頭馬。

第二場張志立爆冷勝出譚廄“有玩意”。此駒季內跑沙地表現水準穩定，上次同程得第三未竟全功。今次原配張志立再爭，騎者出閘快步跟出第二位，沿途小心翼翼，入直路發力衝剌，甩開對手直奔終點，爆出十一倍冷W，替譚文就廄建功。

第三場譚廄再爆“豐收寶”起個冷孖。練者於第二場勝出“有玩意”乘勝追擊，旗下“豐收寶”交安萬堯操刀。出閘搶放在前，沿途節節推進，入直路放甩對手，贏來易如反掌，跑完獨贏有二十六倍，買中者和味。“豐收寶”連場落敗無建樹，今次一二班混戰磅位驟減，終於勝回一仗。譚廄是晚搏殺取得一口冷孖寶，收穫甚豐。

第四場譚文就廄連中三元。練者於二三場起冷孖後意猶未足。是場“豐收年”由任布利押陣，出閘由頭直帶到尾，輕取對手一個多馬位，近七倍半冷門贏來清脆利落，替馬房建功。譚廄是晚一口氣直落贏三場頭馬，此情此景近年少見，今仗可謂贏到笑。

尾場高君濤食尾餬。此子頭場贏完大熱門“洪進威”後，座騎連番熱倒。至尾場騎李森廄“艾卡爾”，以強勁衝剌後上挫敵。此駒久無頭馬見面，今次於四五班混戰恃質凌人，一條直路殺低對手，替馬匹勝回一仗。李森是晚喜添一W，高君濤中兩元食尾餬埋齋。