台上台下星光熠熠

胡楓開騷唱上癮

胡楓前晚的紅館演唱會圓滿舉行，台上眾星雲集。眼見疫情下經濟不景，但依然全場爆滿，胡楓感到非常高興，表示要向捧場嘉賓好友及在場觀眾說聲謝謝。

胡楓（修哥）前晚在紅館舉行演唱會，台上台下眾星雲集，更有羅蘭、“十一哥”何國材等一眾好友捧場，並慶祝修哥再破紀錄。演出途中，修哥的兩名孫女攜一眾曾孫合唱《世上只有》預祝父親節。

下星期在九展舉行個唱的組合Supper Moment，前晚應邀擔任嘉賓，並演唱《幸福之歌》。修哥登場即大讚：“Very good！”主音Sunny（陳仕燊）感謝修哥讚賞，又解釋選擇《幸福之歌》的原因：“我覺得修哥真係一個好幸福的人，因為屋企人、契仔契女、同埋你哋都好愛修哥。我覺得最幸福係你花咗七十年時間奉獻畀香港藝壇，作為後輩，我哋會擺在心裡面、向你學習。我希望Supper Moment去到七十年的時候，我哋都可以企上舞台為大家表演。”修哥則鼓勵後輩說：“一定得！最緊要努力，不斷努力！”其後Supper Moment與修哥合唱《分分鐘需要你》，不過離場後卻在台上留下一個咪高峰架，修哥笑言：“後生仔真係冇手尾！”

修哥亦邀得薛家燕當表演嘉賓，合唱一曲《快樂伴侶》後，兩人憶起數十年前的相識經歷。原來家燕姐兒時為咗與修哥合作，曾經女扮男裝：“當時有套戲叫《魚雁曲》，佢哋要搵一個童星做修哥個仔，不過當時男童星唔多，佢哋就透過爸爸媽媽搵我，又同我講要扮男仔，要剪短頭髮，因為我頭髮好長。我知道要做胡楓個仔，我就即刻話要剪；當然返到學校後，同學就笑我男仔頭，但係可以同修哥拍檔，係我的榮幸。”

家燕姐又指曾三度主動向修哥提出要做演唱會嘉賓，但對方只支吾以對。修哥即解釋：“我七十歲開紅館演唱會，佢已經幫咗我兩晚；到我八十六歲演出時，佢就捧我場，又上台同我跳舞，我點好意思再搵佢呀？”其後修哥落台稍作休息後，家燕姐就唱出《皆大歡喜》，更跳起經典十字步舞。

演出結束後，修哥坦言今次受喉嚨不適影響，表現大打折扣。會否日後再搞演唱會？他直言：“梗係想啦，我依家上咗癮呀！我希望有機會就開多次，再有機會就再開多次。”修哥更透露演出翌日就要返TVB開工，工作完才可以返屋企過父親節，更笑說：“人在江湖，身不由己，冇所謂啦！有得玩就可以啦！”