莫特上校狀態勇進

本馬季尚餘兩個多月煞科，踏入季尾每感人疲馬乏。近期賽事編排所見，各場出賽馬匹小貓三幾隻，戲碼平淡。由於騎師不足，現時每場限跑最多十二匹。今期因艾比上仗受傷缺陣，騎師全數得十一人，講句唔好聽，有人身體不適退賽，騎師買少見少，隨時得十個八個人上陣唔奇。會方已積極培訓本地策騎員做騎師，惟要接受一段時間考核，目前遠水不能救近火，騎師人手緊張問題，料短期內不易解決。

今期只跑周六一次賽事，六場草沙混戰昨已排位。賀蘭杜夫旗下“莫特上校”編在第四場三四班跑千二米。此駒季初贏後評分上調，居三班作戰無甚優勢，早前連拼未能贏馬，季尾練者亟欲替牠勝回一仗。“莫特上校”上仗縮程博大霧，用中野省吾拼得第三。此役未竟全功，但騎者初次接手已算交到功課。拼後匆匆再來，今仗續由此子操刀已駕輕就熟。“莫特上校”千二米起家，成熟後轉向中長途發展，但季內兩戰千八跑得接近，而未能贏馬。上仗回師起家路程有心出擊，此役留前鬥後，直路發力衝刺拼得第三，已收到不俗效果。中野省吾自四月復出後迄取八冠，表現似脫胎換骨。此子騎功不差，陣上搏殺交得準繩，受練者器重。除史偉恩供馬予其出戰，賀蘭杜夫亦倚重中野省吾搏殺，近期勝出“烈火戰駒”及“興測”，騎練合作有辦你睇。“莫特上校”拼後加工打磨，周二晨操由騎者親自快試一課，論馬狀態勇進，今次操足重來擺明要搏。賀廄馬近期出擊有手影捉，賽日此路人馬可留意。