小孩鍾意醜八怪

“E · T豐胸！”卅九年前荷里活電影《E · T外星人》金句，絕無邪念，乃“E · T打電話返屋企”之謂。外星人偶遇地球人，童真無限，童趣無邊。史提芬史匹堡信手拈來，竟就壓倒《星球大戰》，雄踞票房榜首十年，直至拍成《侏羅紀公園》方才讓位。

史公雙親離異，自幼心靈受創，拍片幻想彌補愛的缺憾，不想卻成經典。E · T此物，冇人見過，史公生安白造，借臉愛恩斯坦、海明威，整隻“醜到阿媽唔認得”怪物。本以為嚇親細路，卻成小孩恩物。

當年搵贊助，某大朱古力品牌指E · T樣子嚇死人，唔肯制；另家花生醬糖果則毛遂自薦，卻有後福，片後賺到盤滿砵滿。

《E · T外星人》僅用兩個月拍成，卅九年前今日正式上畫。影片大賣，因上畫地區有先後，誘發各地瘋狂盜版，該片成史上最傷者。有盜版商索性買通影院機房，搬走成套拷貝，照拷可也，同史公分身家，史公欲哭無淚。

西門公子