金奔馳力謀添食

昨朝晨操完畢後，尚有一組試閘，夾埋只得五駒，瞄頭平淡。謝、何廄“健而快”由艾比主轡，出閘由頭直帶到尾，走來惹人好感。此駒季內兩捷評分高企，連仗敗北擺明減分。昨朝試閘見好，作戰水準已有所提升，季尾出賽可留意。談起謝、何廄，前季孖倉後共取三十七W，屬近年佳績。但隨着戰駒勤拼，上季頗多要退役，全季只取十四W成績下滑。今季暫取十W不算太差。兩位倉主目前養馬有限，連新帶舊夾埋十四駒，勝在熟悉馬圈環境，且懂得部署及用人，戰駒搏殺向有把握。不少馬沉後亦可撚返生。旗下“飲水思源”、“駿金剛”及“金寶馬”季內同有勝績，由此可見，兩人練馬有渣拿。尚有“金奔馳”前仗沙地取得久違頭馬，練者部署奇兵突襲。此老馬季內沙草地均無建樹，捧場客亦買到怕，認為戰鬥力已退化。豈料前仗用劉永康跑沙地千六米，突如其來贏俾你睇。

“金奔馳”此役猶如飛將軍從天而降，憑一條直路橫掃對手，表現令人矚目。十歲老馬跑來比同場年輕馬更勝一籌，實力未盡退化。周五沙地夜賽“金奔馳”再遞戰表，今次跑五六班一五一○米，新勝後匆出，幕後趁馬有勇態力謀添食。謝、何廄季尾為爭取成績，戰駒可拼則拼。“金奔馳”刻下正勇，今仗仍可派用場，賽日宜重視。