ToNick相隔兩年再開唱

樂隊ToNick接受香港開電視主播馬梓軒專訪，暢談相隔兩年再舉行演唱會的感受。主音趙善恆（恆仔）表示：“真係好感恩，因為呢兩年唔容易過，連同樂迷接觸機會都冇！但慶幸呢兩年我哋可以繼續創作音樂，當然會為演出做好準備，但都要稍為抑壓興奮。因為到時如果太快用盡所有力量，會維持唔到整個演出，所以要冷靜，慢慢來！”

談及多年來令ToNick為之感動的一件事，成員小龜回憶起一次與歌迷互動的經歷：“記得有一次幫歌迷簽CD時，其中一位喊住走過來，話成日聽我哋唱《阿飛與阿基》好感動。原來呢個樂迷曾經諗過輕生，而呢首歌幫到佢捱過最難捱的時候，然後呢位歌迷最後做咗社工，繼續去幫人。其實寫呢首歌時候，我哋完全冇諗過可以去救一個人或者改變一個人的信念，但呢件事對於我哋係一個鼓勵，我哋都好感動。”

雖然ToNick舞台演出經驗豐富，然而也發生過烏龍事。恆仔笑言：“放鼓的位置正常係需要有一張地氈，烏龍就係有一次演出場地冇地氈，我見到晨曦一路踩個鼓的時候，鼓一路移位。當時已經係表演途中，於是我哋唯有輪流行到去鼓前面、再用腳頂住，哈哈！”