新益美食 舊瓶新酒要去試

牧羊巷的新益美食去年十二月中宣佈因裝修而要暫停營業，經一段時間重整旗鼓，今年三月廿八良辰吉日在臉書宣告重啟。於是，一班同事相約宵夜賀一賀。當晚，由肥仔俠親自掌勺，演繹多款拿手鬼馬菜式，果然舊菜有新味、新菜有風味。

酸菜魚大行其道，肥仔俠亦祭出一道“瘦身鯇魚演嘢篇”，酸菜魚湯伴上一大碗脆米，可伴食亦可做泡飯，脆米配微辣微酸的魚湯，出奇地夾。

有泡飯墊吓肚就可以開酒了，肥仔俠話有道新菜“檸檸七鮮鮑魚涼瓜”，用鹹檸檬煲七喜浸鮮鮑、涼瓜用雷公鑿切件灼熟鋪在沙冰上，鮮、爽、甘，入味透心，無話可說。

當晚重頭戲係一道“雪中送炭之龍馬精神”，“龍馬精神”當然少不了龍蝦，用芝士蒜茸牛油焗新鮮波士頓龍蝦，中間一層“炭”其實係黑松露炒粉絲，“雪”就係炒鮮奶，上面再鋪一層鮮紅魚籽。今年龍蝦大平，唔食就笨；我就話粉絲更妙，皆因炒得又香又爽。

當晚仲試咗蒸釀韭菜餃子肉餅、“花開富貴椰菜香”的葡式白烚蔬菜、不可不食的新益咖喱牛筋腩配油炸鬼和巨大個豬仔包，壓軸蝦籽撈麵就係幾飽都要一試的啦！

新益話裝修，似乎無甚改動，但好多菜式有所創新倒是真的。

穎 兒