浩勝寶馬一放到底

踏入季尾，騎練冠軍之爭漸見明朗。練者錢健明頭馬拋開對手，摘冠機會濃厚。騎者高君濤同張志立單打獨鬥，前者可衛冕冠軍，圈中人看好。

高君濤今季一早霸住頭位，賽至季中頭馬甩開對手。此子搏殺交得準，獲多位練者支持，故座騎不愁寂寞。賀廄近期倚重高君濤搏殺，摩利高亦視為馬房殺手，騎練合作愉快。今日打吡預賽，摩廄精品交高君濤主轡，已擺明搏殺，值得吼緊。

第二場：一二班千二米。“聯安神將”前仗贏同程，上次千五米入位，連仗水準穩定。此駒本質不弱，現居此組作賽應佔便宜。拼後回師贏馬路程，用上高君濤掛帥，論配搭更強。此駒鬥後勁煞食，今次檔宜路合，可重遊勝路。

第三場：“澳門打吡預賽”千五米。“縱橫萬里”上仗千八米贏來輕鬆，反映馬匹實力夠強，今次打鐵趁熱轉戰千五米，原配高君濤操刀來者不善。馬匹拼後打磨甚力，狀態有進無退。今遇上同組對手無多，有力爭取打吡入場券。

第六場：四五班千五米。“浩勝寶馬”季內同高君濤合作屢有戰功，人馬最佳拍檔。此駒質新未盡，季內愈跑愈好。上仗飲恨第二，雖敗仍接近，拼後重新打磨，論馬狀態冒升。今次操足再臨，原配排一檔好位，出閘及時搶出，有力一放到底。