昨晚賽事總投注近三百萬

高君濤連中三元

昨晚沙地賽事完結。是仗跑五場且出馬少，總投注額二百九十七萬元。

頭場七駒角逐爆大冷。兆廄“江河大利”由劉永康主轡，出閘一放到底，六十二倍大冷W輕鬆氣走大熱門“十小精靈”，替馬匹取得來澳首W。“江河大利”在澳服役從來未入過位，今次七駒場合突然發難，快放贏至對手無力招架。劉永康、張兆煊攜手建奇功。

第二場馮廄“銀城雄星”閘前退出，是場實得九駒角逐，賽果熱頭冷腳。張兆煊廄“江河神獸”由高君濤掛帥大熱掄元。此雙人馬上次贏完再來，今次原程出擊捧成大熱。出閘跟住五六位，待至入直路展開強勁衝剌，埋門輕取對手，人馬打叠贏兩W，替馬房建功。兆廄頭場爆完“江河大利”，是場憑同主“江河神獸”起個孖寶，收穫不俗。

第三場高君濤贏劉志森廄“佳運金”連中兩元。此駒上次跑千五米得第五，敗後小休縮程再战。今次跑短途起步應聲彈出，全程帶頭自造步速，一口氣直放到底，逾五倍獨贏以兵不血刅姿態取勝。劉志森增添一W，高君濤連下兩城收穫甚豐。

第四場高君濤連中三元。此子於二三場起孖後再接再厲。是場騎史偉恩廄“電子雄風”以快打慢，出閘守住第二位，全程奮力爭先，入直路掟甩對手率先衝線。此駒季內多仗不勝有位，惟上次跑梗頸四，今次強配高君濤食雞餬補中。史偉恩喜添一W，高君濤三元進帳。

尾場劉永康贏貴廄“金奔馳”起孖食尾餬。此駒季內久無頭馬交出，馬匹連場敗北輸到人怕。上次田中正一跑草地得第五，拼後匆出轉戰沙地。換上劉永康操刀，一條直路橫掃對手，贏來生氣重現。貴廄喜添一W，劉永康起孖食尾餬。