余香凝喜誕千金

余香凝昨日在社交網貼出與老公跟BB的三手互牽照，宣佈女兒Clare出世的喜訊。余香凝大讚BB靚女：“似足爸爸，一個餅印咁！亦都好靚啦，已經有眼眉毛，因為我最擔心BB女會唔會好似我咁好少眉毛，覺得女仔有眉毛好靚。結果似爸爸咁好多眼眉、眼睛好大，所以好可愛。”

余香凝以一段錄音分享喜悅：“好開心BB健健康康出世啦！因為擔心佢體重，最後一次產檢、即係兩星期前都係五磅半，但出世時有六磅半，所以係好開心！”余香凝又大讚囡囡好乖：“我三個鐘頭起身一次，同佢一齊努力嘗試，然後好快就成功有母乳出來。佢又冇亂咁喊，淨係肚餓先喊，所以係好乖。好多老人家都話BB唔好讚，會讚壞晒，但我覺得真係要嘉許一下佢。”

余香凝提到正式當媽媽後跟以前心境不同之處，表示終於真正明白甚麼叫心肝寶貝：“當佢一喊，我就會好擔心，佢有一次喊，我都跟住喊。好多朋友話放鬆啲啦、成世人呀、有排擔心呀，我亦明白到成世擔心的感覺，真係要好好愛錫媽媽！”