濠爽重溫贏馬夢

今午六場草地賽，各場出馬少，最多一場得九匹。“塘水滾塘魚”格局，形勢暗湧重重，賽果唔爆至奇，投注執生。

高君濤近期手風大順，現取四十七W龍虎榜遙遙領先，爭冠軍形勢大好。今仗五駒在手有權數餬。另一好手田中正一暫取二十九W，今季爭冠雖無望，奪取季軍機會濃。此子季內獲多廄支持，除錢廄屬主要基地，練者鄒欽華、賀蘭杜夫及李森亦倚重此子出擊，成各人心腹騎師。今仗多個外線馬房亦供馬其搏殺，務宜吼緊。

第一場：三四歲馬千二米。“和英雄”上仗沙地無功，拼後換人再來。今次加強配搭用田中正一操刀，擺明再搏。此質新馬實力未盡露，近期已有進步。拼後打磨甚力，論態勇進。今番轉戰千二米，抽到一檔有利，冀替此駒打開勝門。

第二場：五六班千八米。“金奔馳”連季未贏，最叻跑位置，但評分減去不少，現居班次應佔便宜。拼後重來，今仗強配田中正一操刀，戰鬥力陡增。此駒跑長途合腳法，遇上同組對手無多，有力勝回一局。

第五場：五六班千八米。“濠爽”草地同程起家，服役後有兩捷紀錄在手。此駒季內求減分，連敗後等待時機出擊。馬匹直路衝刺強，後勁可取，上仗千五米拼得接近。今次復跑長途合脾胃，田中正一主轡不同估計。憑班底支持，可重溫贏馬美夢。