太極開騷紀念已故隊友

太極樂隊日前舉行傳媒茶敍，宣佈八月於紅磡體育館舉行兩場音樂會，鼓手Ricky與緋聞女友戴夢夢同場成為焦點。Ricky指與夢夢相識多年，用“家人”稱呼對方：“咪就係家人囉，我哋會幫對方買吓嘢、住喺附近，所以見面唔會尷尬嘅。今日嚟到現場，一直都覺得未齊人，都未習慣Gary Tong離開咗，突然先發覺得返我哋呢幾個。”

主音歌手雷有輝話演唱會加設紀念Gary Tong環節，邀請對方好友出席：“同佢合作過嘅好朋友實在太多，可能搵佢哋上嚟講吓故事，其實Gary生前一直都準備緊呢個演唱會，我哋係延續佢嘅使命！佢嘅地位永遠無法取代，但係今次音樂會我哋邀請黃丹儀幫手彈琴，可能佢嫌我地成班人‘佬味’太重，初初都唔肯應承，直到同佢飲兩杯、小小醉意佢先Say Yes。”