蔡明思拍廣告老公促銷

女子組合Super Girls成員蔡明思(Jessica)首次為牙擦品牌拍攝代言廣告， 她直言今次是“成就解鎖”:“因為入行後，我有幾個廣告好想接拍，第一個係同牙齒有關的產品，另外係快餐店或者衛生巾。快餐店廣告拍過了，終於可以拍攝到牙齒相關產品廣告，好開心。”

拍攝當日，Jessica拿着牙擦狂擦牙，由早擦到晚，笑言是她一年擦牙次數總和。更大爆老公“導演上身”揸機操刀拍攝試鏡片段。她表示：“疫情關係，呢個廣告係老公幫我喺屋企做試鏡，當時佢好認真幫我拍咗好多個角度，當正自己係導演咁。佢大讚自己拍得非常好，中咗廣告要分一半酬勞畀佢咁話。不過我只會請佢食餐飯，因為我啲錢都係屬於我嘅！”

雖然Jessica老公未能瓜分酬勞，但他仍非常落力向身邊朋友推介Jessica拍攝的牙擦產品，難怪Jessica笑指老公是“人肉宣傳易”。她笑說︰“因為佢由細到大都愛用這牙擦品牌，知道我被揀中代言已經好開心，因為可以拎牙擦畀佢用。”