嫌小鮮肉冇安全感

鄧月平搵男友要識落廚

鄧月平、梁諾妍和譚杏藍為香港開電視新節目擔任主持，更有藍帶廚師做拍檔。眾人現場示範炮製印度咖喱雞，鄧月平笑言：“我好鍾意煮嘢食，可以趁機同藍帶廚師偷師。”

香港開電視全新節目《一秒廚神》昨日開機錄影，由藍帶廚師Andy Dark夥拍鄧月平主持，每集研究美食科學原理及營養學，實行令煮飯仔變得有趣又健康，將食物化腐朽為神奇。

節目組昨日邀來梁諾妍及譚杏藍擔任錄影嘉賓，鄧月平負責煮咖喱雞，還說出如何醃雞肉和烹調方法，她說：“我很喜歡入廚，拍這個節目可以趁機向藍帶廚師偷師。我覺得男仔如果會煮食就會加分，希望可以找到個會煮食的男朋友，以前的男朋友都不會煮食。”

鄧月平表示自己鍾意食、亦鍾意落廚：“對烹飪略有研究，想過去考藍帶。但目前工作好忙，除拍電影，還要籌備新歌MV拍攝。”她更透露今次MV會搵一班男士一起演出：“上次MV得幾個男仔，太少了，而且全部背住我唔見樣。（搵小鮮肉一齊拍？）當然是壯男！要高大、健碩，小鮮肉冇安全感。（揀男友都要健碩？）現實中要搵個識落廚的男人，烹飪叻的男人會加分。如果男朋友帶埋佢煮的食物來探班，不知幾窩心！可惜一直以來也沒有，好慘。”

梁諾妍指自己識落廚，但不太叻。又踢爆自己與男友洪永城都中意白烚食物：“烚蔬菜、丸子和餃子等等。男友因為拍劇要減肥，都要白烚食物。但佢烚餃子煮到溶晒，我都唔知食緊乜。我就係拿捏時間好一點。”

譚杏藍自認本身廚藝都唔叻，笑言幸好與媽咪同住，男友的廚藝比她更差：“我最叻烚蛋，又快又方便。佢只會用微波爐叮，打隻蛋放入微波爐叮！係好簡單，但隻蛋好腥，我好難忘嗰陣腥味。”