與馬德鐘演舊情人

湯洛雯拍親熱戲要報備

馬德鐘及湯洛雯昨日出席新劇開鏡禮，兩人在劇中飾演一對舊情人。湯洛雯被問到男友馬國明會否唔畀她拍親熱戲？馬德鐘笑指馬國明唔係唔畀女友拍親熱戲，只係唔畀同他拍。

馬德鐘（馬神）、湯洛雯（靚湯）、陳煒、何廣沛、郭柏妍、蔣家旻、徐榮、姜大衛、白彪、翟威廉及陳庭欣等，昨日出席新劇《雙生陌生人》開鏡禮。劇中一人分飾兩角的馬神，監製叫他拜完神要食兩份燒肉，生果都要攞雙份。

靚湯表示與馬神在戲中有超多對手戲，因他既是男二又是男一。馬神就說：“係並列男一。”靚湯表示馬神飾演其舊情人，但暫時未見兩人有親熱戲。男友馬國明會否唔畀她拍親熱戲？靚湯笑說：“如果劇情需要都會拍，佢一定唔會唔畀。我都冇要求佢唔拍，佢都可以拍。不過我拍拖之後都未試過拍錫面戲，如果要拍都會講聲。上次同譚俊彥拍親熱戲係拍拖之前拍的，對我來講都有啲激。（唔畀男友睇？）佢九秒九睇咗。”馬神笑說：“馬國明唔係唔畀靚湯拍親熱戲，只係唔畀同我拍。”

今個月六號係靚湯三十四歲生日，她透露計劃香港一日遊：“可能會去行山或去主題樂園玩。” 是否男友返港可以一起慶祝會開心啲？她笑說：“依家有電話視像好方便，唔似以前老竇的年代要打長途電話。（依家可以觸摸到成個人？）我呢啲係靈魂交。”

仍未卸任港姐身份的郭柏妍，今次已是第二次參與劇集演出。她曾參演《白色強人2》，但戲份不多，今次戲份較多，她坦言心情不免緊張：“所以事前做好多功課，亦會熟讀劇本先入廠。”拍感情戲可有底線？她卻說：“只要角色需要，我都可以接受。相信公司劇本寫的尺度唔會太過火，我本身亦冇港姐包袱，就算角色要我唔化妝出鏡都可以。”

郭柏妍透露今次是飾演見習律師，跟飾演師爺的何廣沛是同事關係。兩人在劇中不乏對手戲，更會有感情線。何廣沛透露他在劇中周旋於郭柏妍和蔣家旻之間，構成一段三角戀，十分好艷福。問他最後情歸何處？他笑稱想兩者兼得：“監製仍未寫到，兩個都想要喎，手掌係肉、手背又係肉，不過要畀監製一啲甜頭，等佢寫多幾場感情戲畀我。（唔怕朱晨麗嬲？）又關佢事？”