俊星威威擺明再搏

今季騎師不足，季內只有舊人走，沒有新人來。目前人手唔夠，令馬會費躊躇。近期賽事最多編跑十二匹，有此限制令不少馬匹請纓無路。近日會方着意尋找騎師，最近發掘兩位來自不同國籍地區騎馬人，據聞經多次試閘考檢，會向政府申請彼等出賽，倘成事實可紓緩騎師不足問題。

練者摩利高上仗兩駒搏殺，“犀利快”及“絕影無雙”均跑梗頸。此廄近期有心出擊，但有些馬欠缺運氣。除上述兩駒搏輸，前仗“俊星威威”臨場落重飛，獨贏熱至一戥，可見信心爆棚，惜埋門一步被“森林木”誅殺，頂頭大熱只跑亞軍，令捧場客損失。此駒在澳三戰俱捧成大熱，上仗遇伏輸個咀，敗亦無話可說。“俊星威威”連仗與冠軍無緣，令廄中士氣受挫。做馬主若理解跑馬冠軍只得一個還好，否則連場搏殺未遂，馬匹隨時拉倉轉房亦唔奇。練者為穩定軍心，周五夜賽續派“俊星威威”上陣。今次跑四五班一○五○米，擺明車馬再搏。此駒草地適應，但看腳法跑沙地更佳。上次馬匹直路衝勁頗凌厲，只是恩利克騎來未能充分發揮，此番復爭同程正合脾胃。騎者上仗摸過料會掌握尺寸，遇同組對手無多，冀贏馬交代，賽日不妨追多一次。