周家蔚開舖靠口碑

藝人周家蔚(Janet)日前接受香港開電視主播馬梓軒專訪，分享營商之道。談到新冠疫情對各行各業打擊相當大，Janet亦感受甚深地表示：“疫情期間生意跌咗四成，舖頭唔算開咗好耐，點知運作開始成熟時，就突然有個咁大影響！但我覺得冇問題，仲撐得住，因為好多熟客都好支持我，所以我覺得口碑好緊要。”

Janet四年前與教授護膚品調配的老師夾份開設美容產品店，她坦言兩人合作無間：“我同老師合作得非常好！只係我老公成日話我唔容易相處，哈哈！因為舖頭大多數產品都係由老師親自研發，之後大家慢慢試驗、改良，過程中我會提出有需要改善的地方，老師亦會接受，大家慢慢成長！最初得幾十款產品，到依家有近二百款，都係自己研發的，成件事係好開心！”

與老公洪天明育有兩名兒子的Janet，被問到如何做到事業家庭兩兼顧？她說：“其實當初我決定經營呢間舖，同老師講的第一個條件，就係我會以家庭為先，拍檔理解呢一點就OK！依家兩個仔平時返學和補習，我都會盡量親自接送，所以唔會投訴我冇時間陪佢哋！”