勝利皇星闖三連冠

今日六場草戰，騎師十二人上陣，人手“地莊”見晒。冀角逐過程人馬平安，否則有馬無人騎。張志立上仗中三元，高君濤交白卷，兩人頭馬數字縮窄。前者今仗六駒在手，可否贏馬要視臨場戰意。後者騎足六場，倘打真軍有權數餬。

高君濤上仗唔多醒神無馬贏，令追捧者損手爛腳。今日六駒在手，逐隻計頗具爭勝實力。騎師輪流搵食，話唔埋高君濤今仗大發神威，要捧此子座騎，臨場可吼緊。

第一場：未勝出馬千二米。“美麗人生”連仗得第二，雖敗走勢接近。拼後再臨，配強高君濤乃出擊先兆。此駒服役至今未贏馬，但草地同程三次入位。由此反映，馬匹途程合適。起用高君濤操刀擺明再搏，憑班利人強，可替此駒打破砵齋。

第三場：一二班千五米。“勝利皇星”近期打疊贏兩場，高君濤騎來無得頂，人馬表現夾檔。此駒質素相當高，且沙草俱佳，負重磅亦可應付。贏後原配再來，今番配搭仍完整，復跑草地千五米路程無問題，憑人強馬壯，可勇闖三連冠。

第五場：五六班千八米。“柏駿”上仗同程力拼第二，未贏馬但表現悅目。今番原程出擊，易配高君濤抽到一檔形勢比人強。此駒季內已減分，現居此組有利可圖。今番強配搏殺，遇上同組對手無多，憑路合檔宜，可勝此陣。