紅日金駒爭四連冠

澳馬場騎師有限，上兩仗又有多人受傷。猶幸中野省吾、劉永康及陳卓鋒復出上陣，周日賽事全數十二人，騎師“地莊”見晒，十二駒場合還可湊夠數。中野省吾月前墮馬受傷，休息一段時間復出，現時個人狀態未算最佳。周日出騎四場，“烈火戰駒”及“追鷹”有機會打入三甲者，餘駒不宜高估。騎者餓馬多時，且看表現如何。

劉永康上仗騎“運動名將”墮馬，唞了數天已無恙。今仗復出五駒在手，座騎實力相當，值得重視。

劉永康本地薑騎師根底扎實，雖年屆五十，陣上搏殺仍活力十足。今季所贏十六W有些憑騎功搭夠，如“半畝先生”撼低“江河神彩”，及“紅日金駒”勇挫“江河神獸”，俱埋門贏個咀，可見寶刀未老。此子今季得謝偉豪全力支持，兩人合作迄取十二W交到功課。豪廄今季養馬有限，全倉十一駒，季內暫取十四W。練者夥拍劉永康取得好成績，兩人合作無間。周日草沙混戰，謝偉豪兩駒列陣，貴精不貴多。馬房承接上仗“量子力學”贏馬氣勢出擊。

第四場三班千五米“紅日金駒”挾三捷氣勢重來，今仗要勇闖第四關。此駒轉投豪廄打理得宜，迄今四戰共取三冠一亞，戰績好到無得頂。近三仗沙地全勝，劉永康騎來人馬夾檔。

此番轉戰草地千五米有入位紀錄，憑馬勇路合，可爭取四連冠。