林雪演董卓難頂艷福

由導演周顯揚執導兼監製、獲日本遊戲商授權之電影版《真 · 三國無雙》，本月廿九日在港上映。被網民一致讚賞神還原“董卓”的林雪，無論在造型、以致電影中的演繹，都演活了性情殘暴荒淫的形象，不過神還原的背後其實非常辛苦，經歷炎夏外景及悶熱廠景拍攝的林雪，更形容係折磨。

極具份量的林雪炎夏着古裝，要黐鬚、戴頭飾及披幾層戲服，場場戲大汗叠細汗，問他為何當初肯演董卓，他說：“我接呢部戲時首先睇咗個造型，咦？呢個咪我囉，我先接咋。”跟呂布（古天樂飾）爭美人貂蟬（娜扎飾），林雪笑說：“我同呂布爭女，佢邊有得同我爭呀？”他以往拍戲較少涉女色，這次因為飾演好色暴君而艷福不淺。但他拍被艷女包圍的廠景，揚言頂唔順：“啲女着到‘薄切切’，大家出晒汗，人有體味，幾靚女都好，我覺得係一種折磨。”