體育將軍形勢有利

今季騎師形勢一面倒。近期賽事由高君濤、張志立及何華麟控制戰局。新紮師兄張志立三月份共取八W人氣急升，現同高君濤鬥至平頭。今季爭冠軍未知鹿死誰手，事關尚有五個月馬季才煞科，必有激鬥。

何華麟現排名第三，落後前兩者八W，賽至埋尾可否趕上實難預料。此子近期鬥志堅，陣上拼勁十足，今日六駒在手頗夠份量，睇環境會搏殺。買馬跟紅頂白，臨場可吼。

第一場：六班千五米。“如意娉婷”對前兩仗跑同程闖入位，表現予人好感。上次特別條件賽大熱死火，雖敗走勢仍近。此駒低班貨色，但四歲馬年輕力壯，居六班應有着數。今仗改配何華麟主轡，騎者同廄主合作關係良好。今次接手“如意娉婷”出擊，料必盡拼求逞，可優先考慮。

第三場：二班千五米。“超群出眾”季初何華麟主轡曾勝千二米，人馬夾檔。此駒近期無甚建樹，但連敗減分已回氣。此駒跑同程實力強，前後兼備。復配何華麟操刀，此雙配搭有默契，今次人馬重逢，可坐位望贏。

第六場：四五班千二米。“體育將軍”上仗同程挫敗“勝利鴻星”，何華麟騎來出色。拼後小休重上征途，今仗原配再戰原程，馬匹負磅稍減，形勢有利。“體育將軍”質新馬不斷進步，今仗再交騎者執韁，憑人馬夾檔，可謀添食。