昨日賽事總投注逾四百三十萬

張志立搏殺起孖

昨天草地賽事完結。是仗出馬稍增，戲碼較強，六場總投注四百三十萬六千元。

頭場三四歲馬混戰跑出冷頭熱腳。張志立騎劉志森廄“暴風雪”，以較佳留放後上挫敵。此駒上次用黎昌全跑同程得第七，敗後易配再戰。今仗交張志立押陣，獲減三磅優惠。騎者出閘守好位，入直路由內欄發力竄上直帶返終點，爆出十六倍冷W。“暴風雪”質新潛力未盡露，上次熱身一場即起筷，贏來大把在手。處女馬開齋，騎鍊合作愉快。

第二場黎昌全贏貴廄“興圓”。此駒季內跑千五米開齋，上次余健雄力拼第二未竟全功。今次轉戰長途千八米，復配老搭檔黎昌全主轡。騎者贏過此駒已駕輕就熟，出閘跟隨群駒而跑，入直路展開強勁衝刺，埋門一網打盡，替馬匹勝回一仗。謝貴全近期少贏馬，今次喜添進帳，黎昌全亦居功。

第三場李家輝廄勝出“康安之星”。練者頭場“多臣”有心出擊，無奈何華麟起步大漏閘，結果大熱門跑梗頸四，令幕後人損手。是場旗下“康安之星”由恩利克掛帥決心出擊。此駒藉一檔地利出閘快步搶先，全程貼欄一放到底，贏來全無壓力。跑完獨贏由冷變熱只得四倍，被人大注扑中。輝廄頭場搏殺失利，此場蠃馬補數。“康安之星”升班輕取對手，反映有實力。日後再跑千二米隨時可勝。

第四場張志立贏錢廄“大魔王”。此駒季內連仗無建樹，今次落班而來。同馬房兩駒列陣，近期取兩W的“錢寶通”由田中正一搖旗吶喊，獨贏捧成次熱門，結果跑至三甲不入。“大魔王”則黃袍加身，八倍半冷成真命天子，錢廄“底出”戰術成功。

第五場劉永康贏豪廄“宇宙奇兵”。此駒季內屢戰屢敗，無論冷熱皆北。上次千五米亦無功而回，今次轉戰長途贏馬路。劉永康把握機會，出閘跟前而走，轉末彎發力衝刺，入直路掟甩對手直奔終點，替此駒取得久違的頭馬。跑完獨贏得三倍，被人重鎚扑中。

尾場鮑羅素食尾餬。此子騎適廄“阿努納奇”出閘搶放，一口氣直放到尾。此駒季內多仗未出頭，今次交由鮑羅素操刀發揮水準，替馬匹勝回一仗。