賓菲加大炒聯樂

【本報消息】本地甲組足球聯賽，昨晚七時假氹仔運動場上演兩戰。賓菲加憑射手哥爾斯個人獨取六球，七比○大炒聯樂重返勝軌。士砵亭半場踢多一人，仍以一比二不敵葡人之家，開季吞三連敗。

哥爾斯六六大順

賓菲加上戰被青鋒絕殺全失三分，爭標陷於被動，今戰聯樂將對手當出氣袋。哥爾斯上半場廿七分鐘開紀錄，為賓菲加半場領先一比○。“紅軍”換邊後火力全開，哥爾斯七分鐘內入多兩粒，五十八分鐘完成帽子戲法。不過哥爾斯仍未“收手”，在七十一分鐘後再入三球，個人入夠六球。加上張海山八十一分鐘遠射攻入處子球，賓菲加七比○大炒聯樂全取三分。

葡家力挫士砵亭

另一戰士砵亭鬥葡人之家，法迪早段倒掛為士砵亭開紀錄，惜門將奧利華拉門前犯錯，馬些連奴為葡人之家扳平一比一。但葡人之家半場前，有卡馬拉犯手球兩黃一紅被逐。踢少一人的葡人之家，換邊後反由賓奴破網，以二比一擊敗士砵亭，送對手三連敗。

甲足今晚續戰，澳科鄒北記鬥警察，兩軍上仗同樣贏波，澳科鄒北記有迪亞高、艾美達、林嘉誠領軍，人腳實力有優勢，有力睇好再搶一勝。青鋒迎戰加義，高美斯掛帥鋒線狀態不俗，同樣有望睇好繼續爭勝。