與貓貓拍公益廣告

李幸倪自詡貓星人

李幸倪(Gin)日前為某時裝品牌與香港拯救貓狗協會的聯乘項目拍攝廣告，宣揚領養不棄養信息。今次Gin自願做配角，被廣告中的小貓搶盡鋒頭。

在這輯聯乘廣告中，Gin穿上貓貓T恤後，散發青春活力，片場“貓貓上身”冇時停，更使出零食攻勢俘虜一齊拍攝的貓貓。她笑說：“我唔帶自己的貓貓來拍廣告，因為呢兩隻貓可以讓大家領養，等佢哋多啲曝光，畀人見到佢哋可愛的一面！拍完廣告之後，我哋做咗朋友啦，幫佢影咗好多寫真Send畀朋友，睇吓邊個合眼緣做佢哋新主人，媒人呢個重任就交畀我啦！”

在廣告中，貓貓成為“主子”，李幸倪要使出渾身解數討好愛貓，令牠選中自己做主人。Gin就話自己做慣“奴才”，逗貓完全無難度：“屋企都有位主子‘杏仁糊’，平時放假都要剷便便、梳毛一腳踢，開完餐又要陪摸、陪玩、陪瞓，聽到佢‘煲水聲’就係最大回報。今次拍呢輯廣告，可以為貓咪出一分力，仲可以同貓貓一齊玩！不過我怕收工返到屋企，被佢聞到我摸過第二隻貓，會呷醋嬲我呀。”

拍攝期間，貓貓非常滿意Gin的表現，不時挨在她的腳邊任摸唔嬲。Gin說自己與貓已融為一體，笑言係“貓星人”：“可能我前世都係貓貓，要擼貓完全冇難度！其實寵物同主人都係由信任建立關係，我屋企貓貓地位好高，以前試過有男仔想追我，但係過唔到屋企主子呢一關，所以最後都冇法一齊。因為貓的觀感好強、好單純，佢哋好易睇得出呢個係好人定壞人。所以要做我屋企人，要先過貓貓呢關至得。”