與張振朗演新劇被叫停

高海寧承認等開工

蔡思貝、高海寧及單文柔昨日為無線兒童節目擔任嘉賓。有指王祖藍因要履行首席創意官職務，因而辭演與蔡思貝合演的古裝劇，思貝被問是否仍會有演出？她說要等公司安排。

昨日活動上，有小朋友上前邀請思貝合照，思貝自言跟朋小友有緣：“我曾在德國當過三年嬰兒保母，之前又有幫手照顧契仔，不過目前仍未準備好當媽媽。”思貝表示好友賴慰玲和老公日前因有事做，找她幫手照顧囝囝：“陪小朋友食早餐、做功課，由於小朋友唔鍾意坐定定做功課，結果花了一個半小時才寫出九個英文字；之後陪他食午餐，再換校服返學。還是第一次同契仔單獨相處，感覺好夢幻和感動。”問到是否有信心做個好媽媽？但思貝坦言未準備好：“事業正在衝刺期，根本分身唔到。如果生咗BB，肯定唔會畀工人湊，所以遲啲再算。” 正在休息的她，表示會報讀不同的興趣班增値，又會在家中做手工藝。

高海寧（高Ling）與張振朗合演的新劇《童時愛上你》，近日盛傳因劇本問題要延遲拍攝，高Ling承認現時仍在等通知開工：“之前監製已解釋是因疫情問題，以及希望趁機令劇本寫得更好。雖然我和張振朗等一班演員已開始圍讀，但都覺得是好事，證明公司有要求。”可覺張振朗“黑仔”？高Ling笑說：“我覺得佢一啲都唔黑，佢拎好多獎、演技又好。所有嘢唔好睇過程，最緊要睇結果。知道公司好緊張，蝕住錢都拍劇，係好好的一件事。”

高Ling稱近日趁不用開工拍劇，便做自己感興趣的事情，更睇了已故NBA巨星高比拜仁的自傳。她說：“終於明白佢點解受人敬仰，除咗有實力、態度熱誠，仲要有曼巴精神。”她又謂趁機改變生活習慣：“規定自己每晚十二點前上床就寢，翌日早上七點起床。昨日已進入第三天，發現不單精神好了，還多了時間做其他事情，比如做運動、睇書及下廚，感覺好充實。”不過她坦言自己以往做事都是三分鐘熱度：“希望今次唔會被人睇死，所以我會將每日行程放上網。”

曾是兒童節目主持的單文柔，自從結婚生女後已沒有做主持，她透露最近跟朋友洽談合作搞網上小生意，既可以賺錢，又可以多點時間照顧女兒。昨日重遊舊地，問她會否重返節目？單文柔稱暫時仍未知道：“我都好想工作，但要湊女。個女依家兩歲，呢個年紀開始好好玩，佢會模仿爸爸講說話同動作，我唔捨得丢低佢。”會否生多個小朋友？她說：“呢個問題都有諗，不過依家已經要照顧一個大仔（老公陳展鵬）同一個女，所以可能遲啲先算。”