影壇綠葉西瓜刨

西瓜刨，係資深戲迷集體回憶。黑白片時代，幾乎每片皆現，冇佢不歡。

西瓜刨原名林根，生於廣州，小學雞，曾售貨，醫院打雜，也曾做報社校對。十八歲孤身到香港，校役營生。經校中人介紹，得識粵片名宿黃楚山，進入邵氏前身南洋天一看管道具。

影棚打滾廿年，某日試轉做茄呢啡，原來收入好得多，由此幕後轉幕前。當年大導周詩祿執導紫羅蘭新片《花街慈母》，片頭欲將之列入名單，佢半個師傅高佬泉見樣子奇特，信口開河，“就叫西瓜刨喇！”由是名響數十載。

西瓜刨從未做過主角，然每片有佢，觀眾必定睇得開心。尤其黃飛鴻系列，自一九五五年於《黃飛鴻花地搶炮》首現身，至《黃飛鴻神鞭伏二虎》飾“牙擦蘇”，其哨牙漏口形象深入民心，直頭度身訂造，不作二人想，乃至演足近八十部。

今日係西瓜刨駕鶴仙遊二十年。

西門公子