勝利皇星生氣重現

上周兩仗實力馬多未能交出水準，賽果仍熱倒冷爆，料捧場客不易得甜頭。錢健明廄兩日皆梅開二度，成練者大贏家。現以二十八W拋離對手，進一步擴大領先優勢。馮耀正落後前者七W居次，今季要衛冕冠軍阻力不少，且看季內餘下六個月賽期如何部署。

巴西恩利克上仗憑賀廄“正義聯盟”及“帝皇雄鷹”起孖。兩駒獨贏有得分頭，前駒五倍，後駒十倍，一口孖寶夠和味，並打破月來無馬贏悶局。恩利克前季來澳表現予人好印象，因本身騎功不差，搏殺時有兩三度板斧，曾被視為馬雅接棒人。唯上季只以四十W對五十七W，被高君濤奪去冠軍寶座。今季恩利克演出鋒芒驟減，原因是失去部分策騎基地。上季此子同錢健明合作緊密，今季減少合作，至今所贏九W無一出自錢廄，由此反映，騎練已生嫌隙。但馬圈無永遠敵人，說不定季尾騎練再有合作唔奇。

澳馬本周賽事接踵而至，今期凈跑周日一次。昨周二主課期，各廄備戰忙碌，收操後有兩組試閘。當紅錢廄出試馬較多，馬房枕戈待旦。旗下“勝利皇星”報跑一二班一三五米，今次回師贏馬路程有出擊手影，值得重視。

“勝利皇星”上季由馮廄蟬過別枝，轉投錢廄後摘取兩捷，馬房交到功課。但馬匹贏完評分上調，居頂班作戰無甚便宜。練者便疊埋心水替此駒減分，上季尾至今七戰無建樹，但減去十三分，今於一二班混戰無須負頂磅，應有可勝之道。昨朝此駒交艾比試閘一放迄終，走來生氣重現。今仗試閘磨足有準備，賽日可留意。